Í Sölvanesi er rekinn sauðfjárbúskapur. Um 100 fjár eru á vetrarfóðrun, og sumarbeit er í Hamraheiði.

Húsráðendur eru hjónin Magnús Óskarsson (f. 1947) og Elín Sigurðardóttir (f. 1945). Þau fluttu í Skagafjörðinn 1978 frá Húsavík þar sem þau voru kennarar. Hafa þau haldið þeim störfum áfram samhliða búskapnum.

Fjölskyldan flutti inn í nýbyggt hús 1985. Á næstu árum eftir það var gamla íbúðarhúsið smátt og smátt tekið í gegn og öðlaðist síðan hlutverk gististaðar árið 1990.

Sölvanes er á norðurlandi vestra, í Skagafirði, um 23 km til suðurs frá hringveginum við Varmahlíð. Á þeirri leið er farið fram hjá mörgum bændabýlum. Á svæðinu er umtalsverður hrossabúskapur. Sölvanes stendur undir Hamraheiði og upp frá henni er Járnhryggur um 1000m hár og rétt vestar er Mælifellshnjúkurinn 1138m hár. Á hnjúkinn er stikuð gönguleið og hægt að aka að upphafspunkti hennar um Mælifellsdal.

Á einkabíl: Um 50 m frá upplýsingaskiltinu, sem staðsett er rétt áður en komið er að Varmahlið (frá Reykjavík) er beygt til hægri á veg nr. 752 til suðurs (Merkt: Mælifell / Sprengisandur). Eftir 23 km akstur er Sölvanes á hægri hönd.

Með rútu: Norðurleiðarútan til Akureyrar stansar í Varmahlíð. Gestir eru sóttir þangað, ef óskað er.

Með flugi: Næsti flugvöllur er á Sauðarkróki í um 50 km fjarlægð. Rútuferðir eru frá Sauðarkróki í Varmahlíð í tengslum við Norðurleiðarútuna. Ef nauðsyn krefur eru gestir sóttir á flugvöllinn.